“Жылқыға сүйреткен”: Жетісу облысында күйеуі әйелін қатыгездікпен өлтірді деп айыпталды

Жетісу облысы Ақсу ауданы Баласаз ауылында 32 жастағы Айзат Жұманованың өліміне қатысты қылмыстық іс тергеліп жатыр. Марқұмның туыстары оны күйеуі Айбар Жанболат азаптап өлтірді деп отыр. Қайғылы оқиға 22 маусым күні болған.

Туыстарының айтуынша, Айбар Жанболат әйелі Айзатты бірнеше сағат бойы арқанмен байлап, жылқыға сүйреткен. Бұл жантүршігерлік әрекетті екі жасар қызының көзінше жасаған. Марқұмның денесінде соғылмаған, сау жері қалмаған, тері сыпырылып, еті көрініп тұрған дейді жақындары.

Айбар Жанболат әйелін өзі ауруханаға жеткізгенімен, дәрігерлерге “екінші қабаттан құлап кетті” деп мәлімдеген. Алайда полиция әйел ауруханада қайтыс болғанын растады.

Қазіргі таңда бұл іс бойынша Қылмыстық кодекстің 106-бабы, 3-бөлігімен (“Абайсызда адам өліміне әкеп соққан ауыр дене жарақатын салу”) іс қозғалған. Бірақ марқұмның туыстары бұл баптың тым жеңіл екенін айтып, ауыр жаза талап етіп отыр.

Бұған қоса, Айбар Жанболат жақында Қапал ауылдық округінің әкімі болуға кандидат ретінде тіркелгені белгілі болды. Қазір ол ұсталып, уақытша ұстау изоляторына қамалған.