"Жылдам баюды үйретемін": депутат "инфосығандарға" шара қолдануды ұсынды

Мәжіліс депутаты Жарқынбек Амантайұлы Премьер-министрдің орынбасары Тамара Дүйсеноваға әлеуметтік желілердегі коуч, бизнес-тренерлердің қызметін реттеуді ұсынып, депутаттық сауал жолдады.

"Қоғамды дүрліктірген маңызды мәселенің бірі – әлеуметтік желілердегі арзан ақыл, сапасыз білім сатқыш, білгіштердің көбеюі", – деді депутат Мәжіліс отырысында.

Оның айтуынша, әлеуметтік желілерде "бақытқа жету жолын көрсетемін, жылдам баюды үйретемін, күйзелістен құтқарамын, түпсанаңды түзетемін, бір айда жұлдызға айналдырамын, тез арықтатамын, шет тілінде сайратып жіберемін" деген секілді сан түрлі курс, вебинар, тренинг сататын блогер, бизнес-тренер, коуч, психолог, мотиваторлардың жарнамасы желдей еседі. Тіпті арасында елге танымал шоу-бизнес өкілдері, айтыскерлер де бар көрінеді.

"Олардың жүздеген мың теңгеге бағаланған сабақтарын жұрт тіпті несие рәсімдеп сатып алып, кейін қарызға белшесінен батып қалғаны да жасырын емес", – деді ол.

Депутат "инфосығандардың" ешбір сүзгі мен қадағалаусыз өткізіп жүрген сабақтарының кесірінен талай отбасының шаңырағы ортасына түскенін айтты. Нәтижесінде мұндай "инфосығандар" нағыз сарапшылардың беделіне нұқсан келтіреді.

Оның үстіне, депутат инфосығандар мен түрлі коучтар әлеуметтік желі арқылы миллиондаған ақша тауып, салық төлемейді деп қосты.

Жарқынбек Амантайұлы үкіметке келесі шараларды ұсынды:

Ең алдымен, инфо бизнес платформаларының мазмұны мен идеологиясын және заңдылығына, оны жүргізушілердің деректеріне мониторингті күшейтіп, заң бұзушылықтарға жедел әрекет етуі қажет.
Екіншіден, "Онлайн Платформа және онлайн жарнама туралы" заңға сәйкес, жауапкершілікке тартуда уәкілетті органдарға тиісті уәкілеттік толық берілуге тиіс. Осы уақытқа дейін аталған заң аясында қанша адам жауапкершілік жүктегені жайлы статистиканы ашып көрсету маңызды.
Үшіншіден, бизнес-тренерлер мен коучтер үшін арнайы, кәсіби стандарттар бекітілуге тиіс.
Төртіншіден, халық арасында интернет алаяқтардан, инфосығандардан қорғанудың амалдарын түсіндіру жұмыстарын кеңінен жүргізу қажет.