Жыл басынан бері 400 жол апаты: Астана көшелерінде шұғыл рейд басталып, бақылау күшейтілді

Елорда аумағында жол қозғалысы қауіпсіздігін қамтамасыз ету және жол-көлік оқиғаларының алдын алу мақсатында «Жаяу жүргінші» жедел-профилактикалық іс-шарасы өткізіліп жатыр. Бұл туралы Астана қалалық Полиция департаментіне сілтеме жасаған Polisia.kz порталы хабарлады.

Ресми мәліметтерге сәйкес, жыл басынан бері бас қалада жаяу жүргіншілердің қатысуымен 400-ге жуық жол апаты орын алған. Оның ішінде 82 жағдай жаяу жүргіншілердің өз кінәсінен болғаны анықталды. Жол-көлік оқиғаларының туындауына көбіне жолды белгіленбеген жерден кесіп өту, бағдаршамның тыйым салынған қызыл түсіне өту және жол қозғалысына қатысушылардың ұқыпсыздығы себеп болады. Сондай-ақ, тәуліктің қараңғы уақытында киімде жарық шағылыстырғыш элементтердің болмауы да апат қаупін арттыра түсетіні белгілі болды.

Профилактикалық шара аясында полиция қызметкерлері білім беру мекемелерінің маңында және адамдар көп жиналатын қоғамдық орындарда бақылауды күшейтті. Сонымен қатар, жүргізушілер мен жаяу жүргіншілер арасында ережелерді сақтау бойынша түсіндіру жұмыстары жүргізілуде.

Полиция департаменті жүргізушілерді жаяу жүргіншілер өткелінің алдында жылдамдықты азайтуға, ал жаяу жүргіншілерді жолды тек белгіленген орындардан өтіп, көліктің толық тоқтағанына көз жеткізуге шақырады.