Жыл басынан бері 102 бала терезеден құлап кеткен

Бұл туралы ТЖМ мәлімдеді. 102 баланың 7-і қаза тауып, 95-і түрлі жарақатпен ауруханаға жатқызылған.

Ведомство жыл сайын күн жылына бастағанда, сондай-ақ жазғы мектеп демалысы кезінде балалардың терезеден құлауына байланысты жазатайым оқиғалардың көбейетінін атап өтті. Мұндай фактілер тіркелген кезде балалар ауыр жарақат алып, мүгедек болып қалады не қайтыс болады.

Оқыс оқиғалар Астана (18), Алматы (2), Шымкент (5) қалаларында, Қарағанды (12), Батыс Қазақстан (6), Шығыс Қазақстан (3), Қызылорда (13), Атырау (5), Жамбыл (2), Қостанай (6), Ақмола (5), Ақтөбе (2), Павлодар (6), Солтүстік Қазақстан (1), Маңғыстау (5), Абай (5), Ұлытау (5), Жетісу (1) облыстарында болған.     

Былтыр осындай 170 жағдай тіркелген. Барлық жағдайда балалар терезеге өздігінен көтеріліп, тіреуіш ретінде әртүрлі жиһаздарды қолданған немесе москит торына сүйеніп, онымен бірге терезеден құлап кеткен.

Төтенше жағдайлар министрлігі ересектердің қарауынсыз қалған балалардың қауіпсіздігіне алаңдаушылық білдіреді. 

Үйде болған кезде балалар, ең алдымен олардың ата-аналары қауіпсіздік ережелерін сақтауы керек. Әрбір ата-ана баланың терезеден немесе балконнан құлап кету қаупін азайту шараларын білуі керек:

• Үйде кішкентай бала болса, терезелерді ашық қалдырмаңыз. Өйткені назарыңызды бір секундқа басқа жаққа аударудың өзі баланың өміріндегі соңғы сәт болуы немесе оның біржола мүгедек болып қалуы үшін жеткілікті;
• Терезені тиісті қорғаумен жабдықталмаған москит торларын пайдаланбаңыз - балалар мұндай торларға сүйеніп, нәтижесінде олармен бірге құлап түседі;
• Балалар өздігінен терезені аша алмайтындай етіп, қауіпсіздік құлыптарын орнатыңыз;
• Баланы қараусыз қалдырмаңыз, әсіресе терезелер мен шыны есіктердің жанында ойнауға жол бермеңіз;
• Балалар терезенің алдына шыға алатындай етіп жиһаздарды жанына қоймаңыз.