Жүргізуші куәлігін алу тәртібі өзгермек: негізгі 5 өзгеріс

Қазақстанда жүргізуші куәлігін алу үшін емтихан тапсыру тәртібін өзгерту ұсынылды. Ішкі істер министрлігі емтиханды қайта тапсыру, шетелдік жүргізуші куәлігін ауыстыру және көлікті тіркеуге қатысты түзетулер әзірледі.

Қандай өзгерістер ұсынылып отыр:

• Бірінші рет өте алмасаңыз — емтиханды келесі жұмыс күні қайта тапсыруға болады.
• Екінші рет өте алмасаңыз — келесі мүмкіндікке дейін 10 күн күту керек.
• Үш рет өте алмасаңыз — бұдан кейін тиісті емтиханды қайта тапсыру ақылы болады.
• Теориядан өтіп, тәжірибелік емтиханнан өте алмасаңыз — теориялық емтихан нәтижесі жойылмайды.
• Шетелдік жүргізуші куәлігін ауыстыру үшін теориялық емтихан тапсыру қажет болады. Сонымен қатар құжаттың түпнұсқа екенін оны берген елдің құзырлы органы растауға тиіс.

Көлікті тіркеуге қатысты талапты да жеңілдету ұсынылған. Көлік қайта жабдықталғаннан кейін оны бөлек тексеруден өткізу талап етілмейді. Оның орнына енгізілген өзгерістің қауіпсіз екенін растайтын құжат жеткілікті болады.

Әзірге бұл талаптар күшіне енген жоқ. Олар Ішкі істер министрлігі әзірлеген түзетулерде ұсынылып отыр.