Жұмыс орнындағы созылмалы шаршаудың басты себебі: Ғалымдар тығырықтан шығар қарапайым жолды тапты

Кеңседегі ұзаққа созылған отырыңқы режим тек өнімділікті төмендетіп қана қоймай, адам ағзасына кері әсерін тигізеді. Зерттеушілер күнделікті жұмыс барысындағы шаршауды басып, сергектікті сақтаудың ғылыми негізделген әдісін ұсынды, деп хабарлайды BBC.

Көптеген кеңсе қызметкерлері күннің екінші жартысында энергияның күрт төмендеуін және зейіннің шашырауын байқайды. Мамандар мұны ағзаның қозғалыссыз қалуымен тікелей байланыстырады. Британдық медициналық журналда (British Journal of Sports Medicine) жарияланған жаңа зерттеуге сәйкес, жұмыс үстеліндегі «тапжылмай отыру» әдетінен арылу - шаршауды жеңудің ең сенімді тәсілі.

Ғалымдар 11 мыңнан астам қызметкердің қатысуымен жүргізілген тәжірибе барысында өнімділікті арттыратын оңтайлы алгоритмді анықтады. Оған сәйкес:

 «Бес минуттық серуен»: Әр сағат сайын небәрі 5 минутқа орындығыңыздан тұрып, қозғалу - қан айналымын жақсартып, мидың жұмыс істеу қабілетін арттырады. Бұл әдіс жұмыс ырғағын бұзбайды, керісінше, көңіл-күйді көтеріп, жад пен зейінді өткірлеуге көмектеседі.

Зерттеу жетекшісі Кит Диастың айтуынша, кеңседегі телефон қоңыраулары кезінде жүріп сөйлесу немесе қысқа серуендер жасау - денсаулықты сақтаумен қатар, жұмыс тиімділігін жоғары деңгейде ұстаудың ең қолжетімді жолы.

«Отыруға дағдыланған ағзаны сергіту үшін күрделі жаттығулар қажет емес. Әр сағат сайын жасалған 5 минуттық жеңіл қозғалыс - шаршауды басудың ең жылдам әрі ғылыми дәлелденген құралы», - деп түйіндейді мамандар.

Бұл әдісті күнделікті жұмыс кестесіне енгізу арқылы қызметкерлер кешкі уақыттағы созылмалы шаршаудан арылып, өзін сергек сезіне алады.