Жолға арқан керіп қойған: Риддерде мотоцикл мінген 13 жастағы қыз қаза тапты

Шығыс Қазақстан облысының Риддер қаласында мотоцикл мінген 13 жастағы қыз қаза тауып, 15 жастағы жолаушы ауруханаға жеткізілді, деп хабарлады «Устинка LIVE» ШҚО полиция департаментіне сілтеме жасап.

Қайғылы оқиға 23 тамыз кешке болған. Полиция мәліметінше, мотоцикл тұрғын үй маңындағы бағанаға жылқыны байлау үшін тартылған арқанға соғылған. Мотоциклді басқарған 13 жастағы қыз алған жарақатынан оқиға орнында көз жұмған. Оның 15 жастағы құрбысы ауруханаға жеткізілді.

«Кәмелетке толмаған адамның абайсызда қаза табуына байланысты Риддер қаласының полиция бөлімі қылмыстық іс қозғады. Оқиғаның барлық мән-жайын анықтауға бағытталған қажетті тергеу амалдары жүргізіліп жатыр. Жануардың иесі анықталып, полиция бөліміне жеткізілді», – деп хабарлады ШҚО полиция департаменті.

Қылмыстық істің тергелуін облыстық полиция департаментінің бастығы бақылауға алған.

Риддердегі әлеуметтік желі парақшаларында тұрғындар оқиғаға қатысты түрлі болжам айтып жатыр. Соның бірінде жергілікті тұрғын мотоцикл жүргізушілері үй маңында жүрмеуі үшін арқанды әдейі керіп қойған болуы мүмкін деген пікір тараған. Алайда бұл ақпаратты полиция растаған жоқ.