Жолдың опырылуы мен плитаның ұрлануы: Алматыда бірнеше аудан әкіміне қатаң сөгіс жарияланды

Алматы қаласында жолдың опырылуы мен брусчаткаға қатысты даулы жағдайлардан кейін бірқатар аудан әкімі тәртіптік жазаға тартылды. Бұл туралы қала әкімі Дархан Сатыбалдының кеңесшісі Ильзат Ақчурин мәлімдеді.

Оның айтуынша, Әуэзов ауданының әкіміне Аманжол көшесінде жолдың шөгуі және Яссауи көшесінде асфальттың опырылуына жол берген мердігерлерге бақылау жүргізбегені үшін қатаң сөгіс берілді.

Бостандық ауданында Ерменсай ықшамауданында нөсерден кейін траншеялардың шайылуына, сондай-ақ әл-Фараби даңғылы мен Жароков көшесінде «гранит плиталарын орынсыз алмастыруға» байланысты жауапкершілік жүктелді. Аудан әкімі қызмет бабында болмағандықтан, оның тұрғын үй-коммуналдық шаруашылығы мен абаттандыруға жауапты орынбасары жұмыстан босатылды.

Медеу ауданының әкіміне де Уәлиханов бульварында орын алған оқиға үшін қатаң сөгіс жарияланды. Онда мердігер ұйым плитаны шешіп алып, қала сыртына жеке үйге алып кеткен. Аталған дерек бойынша қылмыстық іс қозғалған.

Сонымен қатар Үлкен Алматы өзенінің арнасын қайта құру және оған іргелес аумақты абаттандыру жұмыстары кезінде «Павлодар өзен порты» АҚ-ның қызметі тексерілетін болды. Жобаға тапсырыс беруші ретінде экология басқармасының басшысына да сөгіс жарияланды. Полиция департаментіне гранит плиталарының ұрлануына қатысты қылмыстық істің тергеу барысын баяндау тапсырылды.

Қала әкімі Дархан Сатыбалды анықталған заңбұзушылықтарды жоюды жүктеп, қала құрылысына бақылау басқармасына мердігерлер мен техникалық қадағалау жұмыстарына қайта тексеріс жүргізуді тапсырды.