Жолда бұзақылық жасағандар бұдан былай темір торға жабылады

Астана қаласының прокуратурасы жол қозғалысы ережелерін (ЖҚЕ) қасақана және бірнеше рет бұзатын жүргізушілерге қатысты жазаның қатаңдатылғанын мәлімдеді. Енді заңды ашық түрде елемейтін тұлғалар тек айыппұлмен шектелмей, әкімшілік қамауға алынады.

Қалалық қадағалау органының түсіндіруінше, егер жүргізуші келесі әрекеттерге барса, оның ісі «Ұсақ бұзақылық» (Әкімшілік кодекстің 434-бабы) ретінде қарастырылады:

• Жол ережелерін демонстрациялық түрде және жүйелі бұзу (мысалы, бір жылда ондаған рет жылдамдықты асыру);

• Жолда қауіпті маневрлер жасап, басқа жүргізушілер мен жаяу жүргіншілерге әдейі қатер төндіру;

• Өзінің заңсыз әрекеттерін видеоға түсіріп, әлеуметтік желілерде жариялау арқылы қоғамдық тәртіпті сыйламайтынын көрсету.

Мұндай құқық бұзушылықтар үшін жүргізушілер 15 тәулікке дейін қамауға алынуы мүмкін. Прокуратураның мәліметінше, бұл шара жолдардағы агрессивті жүргізу стилін тоқтатуға және жазаның бұлжытпастығын қамтамасыз етуге бағытталған. Мәселен, жыл басынан бері 59 рет ЖҚЕ бұзған Porsche жүргізушісі осы бап бойынша қамауға алынған алғашқы тұлғалардың бірі болды.

Астана прокуроры Ғабит Мұқанов атап өткендей, мұндай оқшаулау шаралары жол-көлік оқиғаларының санын азайтуға және қала жолдарында өзара құрмет мәдениетін қалыптастыруға көмектеседі.