Жол апаты қай өңірде жиі орын алатыны белгілі болды

Өткен жылмен салыстырғанда жолдағы апат саны 90%-ға өскен. Бас прокурор Берік Асылов осылай деп мәлімдеді.

Бұл былтырғыдан екі есе дерлік көп. Құқықтық статистика комитетінің мәліметі бойынша, былтыр 8253 жол апаты тіркелсе, биыл 15 862-ге жеткен. Жол апатынан зардап шеккендер де көбейген. Былтыр 1468 адам қайтыс болса, биыл 10 айдың өзінде 1480 адам көз жұмған. Былтыр 10 448 адам жарақат алса, биыл 20 323 адам жарақаттанған.

Бас прокурордың айтуынша, БҚО, ШҚО, Атырау, Маңғыстау, Абай, Ұлытау облыстары мен Шымкент қаласында жол апаты көбейген. 

"Осыған байланысты, прокурорларға мемлекеттік органдармен бірлесіп, ең алдымен жолдардың неғұрлым апаттық-қауіпті учаскелеріне назар аудару арқылы ЖКО-ның себептерін анықтап, нақты шаралар әзірлеуді тапсырдым", – деп жазды Берік Асылов Х желісінде.