Жоғары Сот Кеңесі 17 судьяны қызметінен босатуды ұсынды

Қазақстан Республикасы Жоғары Сот Кеңесінің кезекті отырысында 2025 жылғы жұмыс қорытындысы мен сот жүйесін кадрлық қамтамасыз ету мәселелері талқыланды.

Кеңес төрағасы Дмитрий Малаховтың мәлімдеуінше, сот корпусын жаңарту және білікті заңгерлерді тарту бағытында маңызды қадамдар жасалған. Атап айтқанда, жер, корпоративтік, салық және қаржы құқығы сияқты мамандандырылған салалар бойынша мықты мамандарды іріктеу мақсатында өткен жылдың қыркүйек айында 10 облыстық соттағы бос орындарға конкурс жарияланды. Түсіндірме онлайн-семинарларының арқасында іріктеуге қатысушылар саны өткен жылмен салыстырғанда екі есеге жуық артқан.

Отырыс барысында Біліктілік комиссиясының жұмысын оңтайландыру нәтижелері де оң бағаланды. Судьялыққа кандидаттар үшін емтихан тапсыру рәсімі жеңілдетіліп, жалпы мерзім 1,5 жылдан 3 айға дейін қысқартылды. Сонымен қатар кадрлық резервтің тиімділігі артып, 2025 жылы резервтен жоғары тұрған лауазымдарға 42 судья тағайындалған. Сот жюриінің қызметіне жасалған талдау тәртіптік тәжірибеде бірізділіктің қалыптасқанын және шешімдерге шағымдану көрсеткішінің үштен бірге азайғанын көрсетті.

Жиын қорытындысы бойынша Кеңес 17 судьяны түрлі негіздер бойынша қызметінен босатуды ұсынды, сондай-ақ зейнет жасына жеткен екі судьяның өкілеттігін ұзартты. Тәртіптік жауапкершілікке тартылған үш судьяның шағымы қаралып, Сот жюриінің бұрынғы шешімдері негізді деп танылып, күшінде қалдырылды. Тағайындауға ұсынылған кандидаттар туралы барлық ақпарат Кеңестің ресми интернет-ресурсында жарияланды.