Жоғары аудиторлық палата «Бәйтеректі» қатаң бақылауға алды: даму жоспары түзетілді

«Бәйтерек» ұлттық басқарушы холдингінің 2024–2033 жылдарға арналған даму жоспары мемлекеттік аудиттің қорытындысы бойынша қайта қаралды, деп хабарлады Жоғары аудиторлық палатаның баспасөз қызметі.

Ведомствоның мәліметінше, биыл Жоғары аудиторлық палата «Бәйтерек» холдингі мен оның еншілес ұйымдарына мемлекеттік аудит жүргізген. Тексеріс нәтижесінде Үкіметке холдингтің даму жоспарын қайта қарап, тиімділікті арттыру бойынша бірқатар түзету енгізу ұсынылды.

Атап айтқанда, даму жоспарына:

• қарыз саясатының негізгі қағидаттары;

• қарыз тұрақтылығының сценарийлері мен «ескерту» көрсеткіштері;

• «Мемлекеттік емес қарыз алу көздерінің үлесі» көрсеткіші енгізілді.

Бұл өзгерістер холдингтің қарызды басқару тиімділігін арттырып, тәуекелдерді алдын ала бақылауға және мемлекеттік қаражатқа тәуелділікті азайтуға бағытталған.

«Нәтижесінде аталған түзетулер даму жоспарына енгізілді. Осы мақсатта Үкімет 2023 жылғы 25 желтоқсандағы қаулыны қайта қарап, жаңа қаулы қабылдады. Бұл өзгерістер холдингке борыштық жүктемені уақтылы бақылауға және проблемалар туындамай тұрып алдын алу шараларын қабылдауға мүмкіндік береді. Сондай-ақ қарыздардың бір бөлігін мемлекеттік емес көздерден алу тәжірибесі компанияның ұзақ мерзімді тұрақтылығын арттырады», – делінген Жоғары аудиторлық палатаның хабарламасында.

Палата мәліметінше, бұл шаралар «Бәйтеректің» борыштық саясатын ашық әрі теңгерімді етуге, сонымен қатар елдің жалпы қаржы жүйесіне оң әсерін тигізуге бағытталған.