Жетісудағы сүт зауытының мәселесі Мәжіліс мінберіне шықпақ

ҚР Парламенті Мәжілісінің депутаты Саурықов Ерболат Байұзақұлы Жетісу облысында орналасқан «Көксу СМ» сүт зауытының («Арқабаев» жеке кәсіпкерлігі) өндірістік үдерісімен танысып, кәсіпорын ұжымымен кездесті.

Кездесу барысында зауыттың өндіріс технологиялары, сүт өнімдерінің сапасы мен көлемі, сондай-ақ өңірлік нарықтағы орны туралы толық ақпарат алынды. Ерболат Байұзақұлы кәсіпорынның өңір экономикасындағы маңыздылығын атап өтіп, сүт өнеркәсібін дамытуға бағытталған мемлекеттік қолдау шаралары мен бағдарламалар жөнінде баяндады.

Ұжыммен өткен ашық диалогта өндірістің тұрақтылығы, еңбек жағдайлары, әлеуметтік қолдау мәселелері талқыланып, кәсіпорынның болашақтағы даму жоспарлары мен инновациялық жобалары қаралды. Сонымен қатар, фермерлермен және жергілікті ауылшаруашылық саласындағы серіктестермен ынтымақтастықты кеңейту, шикізатпен тұрақты қамтамасыз ету жолдары сөз болды.

Сонымен қатар, кәсіпорын өкілдері зауыттың орналасқан аумағы Қазақстан Республикасының санитарлық нормаларына толық сәйкес келмейтінін, зауыт маңында тұрғын үйлердің салынуына байланысты бірқатар мәселелер туындап отырғанын жеткізді. Осы мәселелер бойынша арнайы депутаттық сауал дайындалып, Үкіметке жолданатын болады.