«Жетісу» футбол клубының директоры 31,9 млн теңге бюджет қаражатын жымқырғаны үшін сотталды

«Жетісу» футбол клубының директоры Қалмұхамет Дөнсебаев бюджет қаражатын жымқыру ісі бойынша кінәлі деп танылды. Бұл туралы Сыбайлас жемқорлыққа қарсы қызмет хабарлады.

Тергеу нәтижесінде Дөнсебаевтың оқу-жаттығу жиындары кезінде футболшылардың тамақтануына бөлінген 31,9 миллион теңгені жымқырғаны анықталды. Ол келтірілген шығынды толық өтеді.

Талдықорған қалалық соты айыпталушының ауыр науқас екенін ескере отырып, оны 7 жылға бас бостандығын шектеу жазасына кесу туралы шешім қабылдады. Сонымен қатар Дөнсебаевқа мемлекеттік қызметте және квазимемлекеттік секторда жұмыс істеуге өмір бойына тыйым салынды.

Сот үкімі заңды күшіне енді.