Жер сілкінісін ескертетін құрылғы енді тек күшті толқындар кезінде ғана қосылады

Алматы тұрғындарына келген жалған жер сілкінісі туралы хабарламадан кейін мамандар сейсмостанциялар мен MassAlert жүйесін қайта баптап жатыр. Бұл туралы ҚР ТЖМ Informburo.kz сайтының ресми сауалына берген жауабында хабарлады.

21 қыркүйекте алматылықтар ұялы телефонға жер сілкінісі туралы ескерту алып, ғимараттардан эвакуациялану ұсынылған. Алайда жер асты дүмпулері сезілмегенін Сейсмология институтының ғалымдары да растады.

Толқындарды алғаш тіркеген станция Ақжар маңында орналасқан. Автоматтандырылған ерте хабарлау жүйесі сигналды MassAlert-ке жіберіп, содан кейін тұрғындар ескерту алды.

"Қазір мамандар сейсмостанциялар мен датчиктердің жұмысын зерттеп жатыр. Параметрлерді калибрлеп, алгоритмдерді нақтылау үстінде. Бұл хабарламалардың дәлдігі мен жеделдігін арттыруға бағытталған. Сейсмодатчиктер тіркеген дүмпу халыққа және инфрақұрылымға қауіп төндірген жоқ", – деді министрліктегілер.

Алматы қаласы мен облысында бүгінде 50 сейсмостанция орнатылған, оның 28-і автоматтандырылған жүйеге қосылған. Жыл соңына дейін тағы 39 станцияны MassAlert жүйесімен синхрондау жоспарланып отыр.

MassAlert жүйесі Алматыда күші 5 балл және одан жоғары жер сілкінісін тіркесе, автоматты түрде хабарлама жібереді. Қазір хабарламалардың дәлдігін жетілдіру және жер асты дүмпуінің қарқындылығын нақтылау мәселесі қарастырылып жатыр.

ТЖМ түсіндіргендей, 21 қыркүйекте кейбір тұрғындар ескертуді әртүрлі уақытта алған. Бұл байланыс арналарының жүктемесіне және техникалық мүмкіндіктерге байланысты өзгеруі мүмкін.