Жер сілкінгенге дейін не істеу керек?

Төтенше жағдайлар вице-министрі Бауыржан Сыздықов жер сілкінгенге дейін не істеу керек екенін айтып берді.

“Қазіргі уақытта ешбір мемлекет жер сілкінісі болатынын алдын ала біле алмайды. Сондықтан біз тұрғындарға ақпарат таратумен, оларды дайындаумен, үйретумен айналысуымыз керек. Еліміздің 15 аймағында жер сілкіну қаупі жоғары. Біздің азаматтар жер сілкінгенге дейін, жер сілкінгенде, жер сілкініп болған соң не істеу керек екенін білуі керек”, - деді вице-министр.

Вице-министрдің айтуынша, жер сілкінісіне дейін мынадай шаралар орындалуы керек:

• Халық бірінші кезекте қай қабатта, қандай үйде тұратынын, оның қаншалықты жер сілкінісіне төзімді екенін білуі керек;

• Барлық жиһаз қабырғаға бекітілген болуы керек;

• Ауыр заттар жоғарыға қойылмауы керек;

• Дабыл шабаданы шығатын жаққа жақын тұруы тиіс;

• Әр отбасының жоспары болуы тиіс;

• Әр отбасы мүшесі жер сілкінгенде қайда тұру керек екенін білуі керек;

• Егер адам екінші немесе одан жоғары қабатта тұрса, жер сілкінісінің алғашқы дүмпулері басылғанша күте тұруы керек;

• Ертерек ақылдасып келіскен отбасы мүшелерінің жиналатын жері болуы керек.