Жеңістің 80 жылдығы: Астанадағы әскери шеруге 2,5 млрд теңге бөлінді

Астанада Ұлы Отан соғысындағы Жеңістің 80 жылдығына орай әскери шеру өтеді. Оны ұйымдастыруға 2,5 млрд теңге бөлінген, деп хабарлады Sputnik Қазақстан.

Қорғаныс министрлігінің өкілі Виталий Адамовичтің айтуынша, қаражат жанармай мен қосалқы бөлшектер сатып алуға, іссапар шығындарына, әскерлерді көшіруге және әскери форма тігуге жұмсалады.

Шеру үш кезеңнен тұрады:

• Жаяу әскерлердің салтанатты шеруі,
• Механикаландырылған колонналардың жүріп өтуі,
• Әскери авиацияның әуеге көтерілуі.

Шеру барысында тарихи және заманауи әскери техника көрсетіледі. Сонымен қатар алғаш рет Қазақстанда құрылған 23 дивизия мен бригаданың жауынгерлік тулары және Т-34 танкінде сақталған Жеңіс туының көшірмесі шеруге шығарылады.

Шарада соңғы жылдары алынған заманауи қару-жарақ пен әскери техникалар да таныстырылады. Жалпы алғанда, парадқа 4,5 мың әскери қызметші қатысады.