Жекеменшік мектептер мен клиникаларды қаржыландыруға мораторий енгізіледі

Үкімет отырысында Премьер-министрдің орынбасары – Мәдениет және ақпарат министрі Аида Балаева Мемлекет басшысының Ұлттық құрылтайдың V отырысында берген тапсырмалары аясында білім беру мен денсаулық сақтау салаларын қаржыландыру жүйесі түбегейлі қайта қаралатынын мәлімдеді.

Вице-премьердің айтуынша, білім беру саласында жекеменшік мектептерді цифрлық есепке алу, негізгі үдерістерді автоматтандыру және бюджеттеу жүйесімен үйлестіруді көздейтін жаңа тетік пилоттық режимде енгізілген. Нәтижесінде 785 жекеменшік мектеп толық цифрландырылған.

Бюджет қаражатын тиімді әрі мақсатты пайдалану үшін жаңа жекеменшік мектептерге мемлекеттік тапсырыс орналастыруға мораторий енгізіледі. Енді мемлекеттік қаржыландыру тек өңірлердегі нақты қажеттілік бар жекеменшік мектептерге бағытталады. Бұл ретте мемлекеттік мектептердің жетіспеуі, үш ауысымды оқытуды жою және апатты мектептердің орнына жаңа білім беру нысандарын салу басымдыққа ие болады.

Сонымен қатар білім саласына жекеменшік инвестиция тарту мақсатында мемлекеттік тапсырыссыз, тек инвестициялық шығынды өтеу механизмі сақталады. Оқу-ағарту министрлігі мүдделі мемлекеттік органдармен бірлесіп, жекеменшік мектептерге лицензиядан кейінгі бақылауды күшейтпек. Бақылау барысында білім сапасына, педагог кадрлармен қамтуға және оқушылардың қауіпсіздігіне ерекше назар аударылады.

Денсаулық сақтау саласында Денсаулық сақтау министрлігі халықтың нақты қажеттіліктеріне, демографиялық және көші-қон деректеріне сүйене отырып, медициналық көмекті жоспарлаудың жаңа форматына көшеді. Қаржыландыру көлемі тиімді мемлекеттік және сенімді жекеменшік медициналық ұйымдарға бағытталмақ.

Қосарланған төлемдер мен жалған есептің алдын алу үшін бірыңғай цифрлық бақылау жүйесі енгізіледі. Барлық қаржыландыру көздерінің деректері біріктіріліп, пациенттермен кері байланыс мобильді қосымша арқылы жүзеге асырылады. Сондай-ақ сапаны бақылау күшейтіліп, лицензиялау талаптары қатаңдатылады.

Айта кетейік, Міндетті әлеуметтік медициналық сақтандыру жүйесі Қаржы министрлігі қарамағына берілді. Қазіргі уақытта Мемлекет басшысының тапсырмасына сәйкес, құқық қорғау органдарымен бірлесіп «Заң және тәртіп» қағидаты аясында тексеру жүргізіліп жатыр. Сонымен бірге жеке медицина және білім беру ұйымдарын қаржыландыру тетіктерін қайта қарауға арналған іс-шаралар жоспары бекітілді.