“Жеке өзім қадағалаймын”: Тоқаев әскердегі әлімжеттікке қатысты мәлімдеме жасады

Мемлекет басшысы Қасым-Жомарт Тоқаев армиядағы сарбаздардың қаза табуына қатысты оқиғаларды «өркениетті елге жат, теріс үрдіс» деп атап, Қарулы Күштердегі тәртіп пен тәрбие мәселесін жеке бақылауында ұстап отырғанын мәлімдеді. Бұл туралы Президент «Turkistan» газетіне берген сұхбатында айтты.

Президенттің сөзінше, бейбіт заманда әскери борышын өтеп жүрген сарбаздардың жарақат алуы немесе қаза табуы мүлде болмауға тиіс.

«Мен әскери борышын өтеуге шақырылған сарбаздардың жарақат алуы мен қаза болуына қатысты оқиғаларды өркениетті елге жат, теріс үрдіс деп санаймын. Бейбіт заманда мұндай жайттар болмауға тиіс», – деді Қасым-Жомарт Тоқаев.

Мемлекет басшысы бұл мәселені барлық күштік құрылым басшыларымен өткен кеңесте көтергенін айтып, қорғаныс саласына жауапты басшылықты тәрбие жұмысын жеткілікті деңгейде қадағаламағаны үшін сынға алғанын жеткізді.

«Армия жастарға қолдау көрсетіп, оларды еліміздің нағыз азаматы ретінде тәрбиелеп шығаруы керек. Командирлер әскери қызметшілерге үлгі-өнеге болуға тиіс. Әскерде әлімжеттікке, бұзақылыққа, рушылдыққа, жершілдікке орын жоқ, ондай жайттарға жол берілмейді. Мұның бәрін өзім жеке қадағалап отырамын», – деді Президент.

Қасым-Жомарт Тоқаев ахуалды түзету үшін шұғыл шаралар қабылдау жөнінде нақты тапсырмалар бергенін де атап өтті. Сонымен қатар қайғылы оқиғалар барлық әскери бөлімдерге тән емес екенін айтты.

Президент кейбір блогердің әскердегі жағдайды әдейі бұрмалап көрсетіп жүргеніне де тоқталды.

– «Танымалдыққа ұмтылған кейбір блогер әскердегі шынайы ахуалға мүлдем жанаспайтын сөз таратып жүр. Олар армияны сарбаздар күн сайын дерлік қылмыскерлердің құрбанына айналатын жер ретінде көрсеткісі келеді», – деді Мемлекет басшысы.

Оның айтуынша, шын мәнінде әскери қызмет жастарға өзін дамытуға мүмкіндік береді. Әскери борышын өтеп келген азаматтар жоғары оқу орындары мен колледждерде тегін білім ала алады, ал әскерде жүргенде сұранысқа ие мамандықтарды меңгереді. Келісімшартпен қызмет ететін әскери қызметшілер мен офицерлер әлеуметтік тұрғыдан толық қорғалған.

Президент армияда қатаң тәртіп болуы тиіс екенін де атап өтті.

«Сарбаздар ант бергенде “Әскери қызметтің ауыртпалықтары мен қиыншылықтарын табандылықпен көтеремін” деп айтады. Бұл әскери өмірдің қатаңдығын айқын көрсетеді», – деді Қасым-Жомарт Тоқаев.

Сонымен қатар Мемлекет басшысы Қарулы Күштерді технологиялық тұрғыдан жаңғырту жұмыстары қарқынды жүріп жатқанын айтты. Былтыр Ұлы Жеңістің 80 жылдығына орай өткен әскери шерудің жоғары деңгейде өткенін, онда Қазақстан армиясының заманауи қару-жарақпен, оның ішінде отандық өнімдермен жабдықталғаны көрінгенін атап өтті.

Президент жуырда Тараз қаласындағы мамандандырылған әскери мектепке барғанын да еске салды. Бұл оқу орнында әлеуметтік жағынан осал отбасылардан шыққан балалар білім алады.

«Мен осы мектепке аты аңызға айналған батырымыз Бауыржан Момышұлының есімін беру туралы шешім қабылдадым. Облыс орталықтарының бәрінде осындай мектептер ашуды тапсырдым», – деді Қасым-Жомарт Тоқаев.

Мемлекет басшысы мұндай білім ордаларынан ел мақтан тұтатын сардарлар мен генералдар тәрбиеленіп шығатынына сенім білдірді.