Жазғы демалыста оқушыларға жұмыс істеуге бола ма?

Оқу жылы аяқталуға аз қалды. Оқушылардың көбі жазғы демалысында жұмыс істеп, еңбекке ерте араласа бастайды. Оған заң не дейді? Оқушылар қандай жұмысқа орналаса алады? Осы туралы мамандар айтып берді.

Жасөспірімдердің жұмыс істеуіне заң шектеу қоймайды.

“ҚР Еңбек кодексінің талаптарына сәйкес 18 жасқа толмаған жұмыскерлерге келесідегідей уақыт белгіленеді. 14 жастан 16 жасқа дейінгі аралықтардағы жұмыскерлерге аптасына 24 сағаттан аспауы керек. 16-18 жас аралығындағы азаматтарға 36 сағаттан аспауы керек”, – деді заңгер Асқар Астаев 24kz-ке.

Жазғы демалысын бос өткізгісі келмегендер үшін “Жасыл ел” секілді мемлекеттік жобалар қарастырылған.

"Жасыл ел" еңбек жасағының негізгі мақсаты – жастарды жұмыспен қамтамасыз ету ғана емес, сонымен қатар жастардың арасында экологиялық мәдениетті қалыптастыру және елді мекендерді абаттандыру”, – деді Жастар және отбасы істері комитеті төрағасының орынбасары Біржан Әлімжанов.

Биыл бұл жоба аясында 33 мың жасты жұмыспен қамту жоспарланған. Оларға жаз айларында 85 мың теңге еңбекақы төленеді. Ол үшін оқушының жасы 14-тен асса жеткілікті.

Біржан Әлімжанов түрлі мекемелерде қоғамдық жұмыс істейтіндер 40 АЕК (150 мың теңге) шамасында жалақы ала алатынын айтты.

“Демалыс уақытында 16 жастан асқан жастар, оның ішінде студенттер болсын, колледж, мектеп оқушылары болсын осы қоғамдық жұмысқа қатысуға толық мүмкіндігі бар. Осы жылы оның жалақысы 40 АЕК деңгейінде”, – деді ол.