Жазда – аквапарк, қыста – картинг: Түркістанда ерекше демалыс кешені бой көтереді

Түркістан облысының әкімі Нұралхан Көшеров шетелдік инвестормен кездесіп, өңірде халықаралық стандарттарға сай келетін заманауи аквапарк салу жобасын талқылады, деп хабарлайды Түркістан облысы әкімінің баспасөз қызметі. Бұл ауқымды ойын-сауық кешені Түркістан қаласын Орталық Азиядағы ірі туристік хабқа айналдыру бағытындағы маңызды қадам болмақ.

Жобаға сәйкес, жаңа кешеннің жалпы аумағы 120 мың шаршы метрден асады. Онда су аттракциондарынан бөлек, кемпинг форматындағы жайлы қонақүй, қонақтарды қабылдау орталығы және салтанатты шаралар өткізуге арналған банкет залы орналасады. Нысанның басты ерекшелігі – оның жылдың кез келген мезгіліне бейімделуінде. Жаз мезгілінде келушілер су айдынында шомылып, биік горкалар мен «торнадо», «радуга» аттракциондарын пайдаланса, қыс айларында бұл аумақ картинг трассасына айналады. Мұндай әмбебап шешім кешеннің тоқтаусыз жұмыс істеуіне мүмкіндік береді.

Кездесу барысында тараптар тек туризм саласын ғана емес, өндірістік жобаларды да талқылады. Атап айтқанда, «Turan» арнайы экономикалық аймағында жаңа өндіріс қуаттарын іске қосу бойынша келіссөздер жүргізілді. Бұл өңірдегі жұмыссыздық мәселесін шешуге және экономиканы әртараптандыруға оң әсерін тигізеді.

Жалпы, Түркістан облысында қолайлы инвестициялық климат қалыптасқан. Мәселен, 2025 жылға бекітілген негізгі капиталға салынған инвестиция жоспары 1 трлн 427 млрд теңгені құраса, іс жүзінде бұл көрсеткіш 1 трлн 746 млрд теңгеге жетіп, 121,6%-ға өскен. Осындай жүйелі жұмыстардың нәтижесінде Түркістан тек рухани астана ғана емес, сонымен қатар ірі инвестициялық орталық ретінде де нығайып келеді.

Жаңа туристік кешеннің іске қосылуы өңір тұрғындары мен шетелдік қонақтар үшін қолайлы демалыс орнына айналып, облыстың экономикалық дамуына соны серпін бермек.