"Жайлы мектеп" ұлттық жобасы тоқтауы мүмкін

Ел бойынша апатты мектептер мен оқушы орнының тапшылығын жою мақсатында іске қосылған "Жайлы мектеп" жобасы тоқтап қалуы мүмкін. 2023 жылы жобаға бөлінген 500 млрд теңге толық игеріліп, биылға бөлінген қаржы әлі берілмеген. «Samruk-Kazyna Construction» АҚ басқарма төрағасының бірінші орынбасары Ғабит Малғаздаров осылай деп мәлімдеді.

Пилоттық жоба аясында 2025 жылдың соңына дейін 740 мың оқушыға арналған 369 заманауи мектеп салынуы тиіс. Жобаға республикалық бюджет пен Ұлттық қордан 2,3 трлн теңге бөлінген. Дәлірек айтсақ, 2023 жылға 499,9 млрд теңге, 2024 жылға 976,3 млрд теңге, 2025 жылға 909,4 млрд теңге қаржы қарастырылған.

Алайда биылға бөлінген қаржы жобаға әлі берілмеген.

"Ұлттық қордан 2024 жылы 813 млрд теңге қарастырылған. Қалғаны ресбпубликалық бюджеттен қарастырылған. Жарты жыл өтті, бізде әлі ақша жоқ. Бізге бюджетте ақша жоқ деп жатыр", – деді Ғабит Малғаздаров Atameken business телеарнасының "Түскі формат" бағдарламасында.

Ол бюджеттен қаржы бөлінбесе, құрылыс жұмыстары тоқтап қалу қаупі бар екенін айтады.