Жатақханада орын жетпесе қайда шағымдану керек: Студенттер білуі тиіс басты ережелер жарияланды

Қазақстанда жаңа оқу жылының басталуымен бірге студенттер мен ата-аналардың басты мәселесі – жатақхана табу мәселісі өзекті бола түсті. Осы орайда елімізде орынды кімдер бірінші болып алатыны ресми түрде жарияланды.

Бүгінгі таңда елімізде 281 жаңа жатақхана іске қосылып, 72 125 орын дайындалған. Оның ішінде 182 жатақхана (51 323 орын) тек жоғары оқу орындарының студенттеріне арналған.

Дегенмен орын бәріне бірдей бір мезгілде тимейді. Ең алдымен басымдыққа ие болатын санаттар:

• Ата-анасының қамқорлығынсыз қалған студенттер

• Мүмкіндігі шектеулі жандар

• Көпбалалы және аз қамтылған отбасылардан шыққандар

• Ауыл жастары

• «Серпін» жобасы бойынша оқуға түскендер

• Қандастар және басқа да әлеуметтік осал топтар

Орын жетпей қалса, қайда жүгіну керек?

Жатақханадан орын таппай әбігерге түскен студенттер үшін министрлік арнайы құтқару орталықтарын ашты. Мәселені шұғыл шешу үшін мына орталықтар жұмыс істейді:

• Ситуациялық орталық (Қазақ ұлттық қыздар педагогикалық университеті базасында) – бос орындар туралы ақпарат береді.

• Кризистік орталық (Тынышпаев атындағы университет базасында) – форс-мажорлық жағдайда уақытша баспана табуға көмектеседі.

Сонымен қатар әр өңірде студенттердің құқығын қорғайтын студенттік омбудсмендер тағайындалған.

Кімдерге ақшалай өтемақы төленеді?

Қуантарлық жаңалықтардың бірі – әлеуметтік осал санаттағы кейбір студенттерге мемлекет тарапынан қаржылық көмек қарастырылған. атап айтқанда, жетім балалар, I және II топтағы мүгедектігі бар немесе бала кезінен мүгедек студенттер жатақханада тұрғаны үшін 29 АЕК-ке дейін (шамамен 100 мың теңге) компенсация ала алады.