Жастардан банк карталарын сатып алып, интернет-алаяқтарға өткізген күдікті ұсталды

Полиция интернет-алаяқтарға банк карталарын сатып алып берген деген күдікпен ер адамды ұстады. Бұл туралы Ішкі істер министрлігі хабарлады.

Тергеу мәліметінше, күдікті 18 бен 25 жас аралығындағы жастардан банк карталарын 20–30 мың теңгеге сатып алған. Кейін бұл карталар интернет-алаяқтардың ұрланған ақшаны қолма-қол ақшаға айналдыруы үшін пайдаланылған.

Алдын ала мәлімет бойынша, аталған банк карталары арқылы шамамен 10 миллион теңге қолма-қол ақшаға айналдырылған.

ІІМ мәліметінше, биыл Ақтөбе облысында интернет-алаяқтыққа қатысы бар 60-тан астам дроппер анықталып, ұсталған.

Ведомство азаматтарды банк карталарын, шоттарын немесе жеке деректерін бөгде адамдарға бермеуге шақырды. Мұндай әрекет қылмыстық жауапкершілікке әкелуі мүмкін.

Еске салайық, 2025 жылдың қыркүйегінен бастап Қылмыстық кодекске дропперлік үшін жауапкершілік енгізілді. Заңға сәйкес, мұндай қылмыс үшін айыппұлдан бастап мүлкін тәркілей отырып жеті жылға дейін бас бостандығынан айыру жазасы қарастырылған.