Жасөспірімдерге әлеуметтік желіге кіруге тыйым салына ма: заң жобасы жаңа Парламентте қаралмақ

Қазақстанда 16 жасқа дейінгі балалардың әлеуметтік желілерге тіркелуін шектеу туралы шешім жаңа парламент алаңында қаралуы мүмкін. Бұл туралы Мәдениет және ақпарат вице-министрі Евгений Кочетов мәлімдеді.

Оның айтуынша, Мәдениет және ақпарат министрлігі тиісті заңнамалық өзгерістер пакетін әзірлеген. Құжатта 16 жасқа дейінгі балаларға әлеуметтік желілерде тіркелуді шектеу нормасы қарастырылған.

Вице-министр нақты тетіктері әлі толық айқындалмағанын айтты. Қазіргі уақытта ұсыныстар мемлекеттік органдармен талқыланып жатыр, заң жобасы Парламентке әлі енгізілмеген.

Кочетовтің сөзінше, бұл мәселе әлемде кеңінен талқыланып отыр. Бірқатар еуропалық ел осындай шектеулерді қарастырып жатыр. Сондықтан Қазақстанда да мұндай шараларды енгізу қажеттігі айтылып отыр.

Алдын ала мәлімет бойынша, шектеу жаңа аккаунт ашатын пайдаланушыларға қатысты болуы мүмкін. Бұрын тіркелген балаларға қалай әсер ететіні әзірге белгісіз.

Аталған заң жобасында онлайн-платформалар мен медиа қызметтерін реттеуге қатысты өзге де нормалар қамтылған. Құжат Үкімет қарауында, ал оны әрі қарай талқылау жаңа парламент – Құрылтай аясында жалғасады.