Жасөспірімдердің өмірін құтқаруға 283 млн теңге жиналды: Алматыда ЮНИСЕФ қайырымдылық кеші өтті

28 қарашада Алматыда UNICEF Gala Dinner «Dreams Without Borders» өтті. Іс-шарада 283 млн теңге жиналды. Бұл қаражат жасөспірімдердің психикалық денсаулығын қолдау бағдарламасына бағытталады, деп хабарлайды ЮНИСЕФ.  Бағдарлама аясында 50 500 маман оқытылып, 140 000 жасөспірімге психологиялық қолдау көрсетіледі, ал 10 000 жас жеке немесе топтық терапия алады.

ЮНИСЕФ Қазақстандағы жасөспірімдердің психикалық денсаулығын қолдауға жүйелі бағдарламаны іске қосады. Бағдарлама Алматы, Шымкент және Түркістан облыстарында жүзеге асырылады, соның ішінде ауылдық жерлерді де қамтиды. Мақсат – жасөспірімдер арасындағы психологиялық қиындықтарды ерте анықтап, оларға мамандандырылған көмек көрсету.

ЮНИСЕФ Қазақстандағы өкілі Рашед Мустафа Сарвардың айтуынша, бағдарлама бір жылға емес, ұзақ мерзімге арналған.

Статистикаға сәйкес, әлемде 13%-дан астам жасөспірімнің психикасы бұзылған. Ал 15–29 жас аралығындағы жастардың өлім себептері арасында суицид үшінші орында тұр. Қазақстанда 15–34 жас аралығындағы жастар арасында өз-өзін зиян келтіру мен суицид негізгі өлім себептерінің бірі. Ауылдық жерлерде суицид деңгейі қалаларға қарағанда 1,8–2,2 есе жоғары, ал жағдайлардың 90%-ы психикалық денсаулық мәселелеріне байланысты және уақтылы қолдауды қажет етеді.