Жарық неден өшті: Энергетика министрлігі мән-жайды түсіндірді

14 тамызда Қазақстанның бірқатар өңірінде электр энергиясын беруде уақытша үзілістер орын алды. Қазақстан Республикасы Энергетика министрлігінің мәліметінше, бұл ахуал Орталық Азия энергосистемасы тарапынан электр қуаты ағынының күрт өзгеруі салдарынан туындаған.

Аталған күнү энергожүйеде қуаттың лезде артуы тіркеліп, соның нәтижесінде қауіпсіздікті қамтамасыз ету мақсатында апатқа қарсы автоматтандыру жүйелері іске қосылды. Бұл өз кезегінде республиканың кейбір өңірлеріндегі электр тұтынушыларын апатты түрде ажыратуға әкеп соқтырды.

Атап айтқанда, Алматы қаласы мен Алматы облысында «KEGOC» АҚ-ға тиесілі 500 кВ үш жоғары вольтты электр беріліс желісінің авариялық ажырауы салдарынан 300 МВт жүктеме сөніп, «Алатау Жарық Компаниясы» желілерінде қорғаныс автоматтары іске қосылды. Осының салдарынан Алматы қаласының (Бостандық, Наурызбай, Әуезов, Алатау аудандары) және облыстың бірқатар аудандарының тұтынушылары уақытша жарықсыз қалды.

Қазіргі уақытта «KEGOC» АҚ жүйелік операторы мен «Алатау Жарық Компаниясының» мамандары барлық қажетті қалпына келтіру жұмыстарын жедел түрде жүргізіп жатыр. Кейбір өңірлерде электрмен жабдықтау жүйесі толықтай қалпына келтірілді.

Ведомство бұл мәселенің Энергетика министрлігінің қатаң бақылауында екенін атап өтті. Электр қуатын беру жүйесін толық қалпына келтіру барысы туралы қосымша ақпарат берілетін болады.