Жаркентте баласын батареяға байлап ұрған әйел қамауға алынды

Жаркент қаласында полиция әлеуметтік желіде тараған бейнежазбадан кейін 28 жастағы әйелді ұстады. Видеода оның кәмелетке толмаған ұлын жылу батареясына байлап, ұрып-соққаны көрінеді. Оқиға кезінде бөлмеде басқа балалардың да болғаны анықталған.

Жетісу облысының полиция департаменті мәліметінше, әйелдің жеке басы анықталып, аталған дерек бойынша қылмыстық іс қозғалған. Жәбірленуші бала полицияға жеткізіліп, мән-жайы анықталып жатыр. Ал анасы уақытша тергеу изоляторына қамалды.

Сонымен қатар үйде болған екі өзге кәмелетке толмаған бала уақытша Отбасын қолдау орталығына орналастырылды. Қорғаншылық және қамқоршылық органдары әйелді ата-ана құқығынан айыру мәселесі бойынша тиісті өтініш жолдамақ. Бұл сұрақ бөлек тәртіппен қаралады.

Қазіргі уақытта оқиғаға қатысты тергеу амалдары жалғасып жатыр. Құқық қорғау органдары балалардың қауіпсіздігі басты назарда екенін мәлімдеді.