Жәрдемақыдан қағылуыңыз мүмкін: отбасы санаты қате есептелсе не істеу керек?

Қазақстандықтар Цифрлық отбасы картасында отбасы құрамы немесе әл-ауқат деңгейі қате көрсетілсе, мәліметті қайта тексертуге өтініш бере алады. Бұл туралы Еңбек және халықты әлеуметтік қорғау министрлігі хабарлады.

Ол үшін тұрғылықты жері бойынша Әлеуметтік қорғау саласындағы реттеу және бақылау комитетінің аумақтық департаментіне немесе әкімдіктің жұмыспен қамтуды үйлестіру және әлеуметтік бағдарламалар басқармасына жүгіну қажет.

Министрліктің түсіндіруінше, мамандар Цифрлық отбасы картасындағы мәліметтерді тексеріп, сәйкессіздіктің себебін анықтайды және қате деректі түзетуге көмектеседі.

Қате ақпарат бастапқы жүйеде түзетілгеннен кейін жаңартылған мәлімет Цифрлық отбасы картасына автоматты түрде беріледі. Келесі бағалау кезінде отбасының санаты қайта есептеледі. Азаматқа қайтадан өтініш берудің қажеті жоқ.

Отбасы құрамы мен оның әл-ауқат деңгейі ай сайын қайта есептеледі. Мысалы, отбасының табысы азайса, мүлкі сатылса немесе отбасы мүшелерінің саны көбейсе, оның санаты өзгеруі мүмкін.

Отбасының әл-ауқатын анықтау кезінде 59 көрсеткіш ескеріледі. Олардың арасында табыс, тұрғын үй жағдайы, жұмыспен қамтылу, жылжымайтын мүлік, көлік, кәсіп және несие, оның ішінде мерзімі өткен берешек бар.

Цифрлық отбасы картасы 2023 жылғы 1 қаңтардан бері жұмыс істейді. Қазір онда 6,2 миллион отбасыға біріктірілген 20,6 миллион азамат туралы мәлімет бар. Бұл ақпарат азаматтардың мемлекеттік қолдауға мұқтаждығын анықтау үшін пайдаланылады.

2027 жылғы 1 қаңтардан бастап мемлекеттік жәрдемақылардың бір бөлігі отбасының мұқтаждығы ескеріліп тағайындалады. Шектеу А және B санатына жататын отбасыларға қатысты болады. Тізімге бала тууына байланысты, бала бір жарым жасқа толғанға дейін оның күтіміне және көпбалалы отбасыларға берілетін жәрдемақылар да енгізілген. Кейбір азаматтарға бұл талап қолданылмайды.

Қолданыстағы әдістеме бойынша отбасын А немесе B санатына енгізетін бірыңғай табыс мөлшері жоқ. Санат барлық көрсеткіш бойынша жиналған ұпайға қарай анықталады: А санаты – 1800 және одан жоғары, B санаты – 730-1799 ұпай.