Жапония мен Қазақстан «жасыл экономика» бағытында жаңа жобаларды талқылады

Бүгін Астана қаласында Жапонияның жетекші компанияларының декарбонизация және экологиялық технологиялар бойынша таныстырылымы өтті. Іс-шараға Токио губернаторы Юрико Коикэ қатысты. 

Форум Radisson Hotel Astana қонақүйінде ұйымдастырылып, оны Жапония Үкіметі, ҚР «Атамекен» Ұлттық кәсіпкерлер палатасы және Қазақстанның Сыртқы сауда палатасы бірлесіп өткізді. Кездесу Қазақстан мен Жапония арасындағы экономикалық және технологиялық әріптестікті нығайтуға бағытталды. 

Іс-шараға мемлекеттік органдардың өкілдері, бизнес қауымдастық және жапон компанияларының делегациясы қатысты. Тараптар тұрақты даму, экологиялық қауіпсіздік және «жасыл» экономикаға көшу мәселелерін талқылады. 

Жиында «KAZAKH INVEST»  АҚ Азиямен ынтымақтастық жөніндегі жобалар жетекшісі Алия Абдильдина сөз сөйлеп, Қазақстанның инвестициялық саясаты мен болашақ бағытына тоқталды. Оның айтуынша, Қазақстан 2060 жылға қарай көміртегі бейтарап мемлекет болуды мақсат етіп отыр және осы бағытта жүйелі реформалар жүргізіп келеді. 

«Қазақстан бүгінде жаңа инвестициялық орталық ретінде қалыптасып келеді. Kazakh Invest – шетелдік инвесторлар үшін ашық терезе, болашақ мүмкіндіктерге жол ашатын алаң», – деді ол. 

Сонымен қатар, спикер Жапонияның іскерлік мәдениетіне ерекше тоқталды. Оның айтуынша, жапон бизнесінің негізгі құндылықтары – сапа, жауапкершілік және мінсіздік, бұл Қазақстанмен ұзақ мерзімді әріптестікті дамытуда маңызды рөл атқарады.

Бағдарлама барысында бірнеше жапон компаниясы өз технологиялық шешімдерін ұсынды. Олар Aeronext Inc., SAKIGAKE JAPAN Corporation, ZEPHYR CORPORATION, SORAMITSU CBDC және Revo International Inc. компаниялары. Олар дрон технологиялары, күн және жел энергетикасы, биоэнергетика және көміртек нарығына қатысты инновациялық жобаларын таныстырды. Сыртқы сауда палатасының Басқарма төрағасы Мұрат Каримсаков өз сөзінде Қазақстанның Жапониямен технологиялық ынтымақтастықты кеңейтуге ерекше мән беретінін атап өтті. Оның айтуынша, жапон тәжірибесі өндірістік тиімділікті арттыруға және экологиялық шешімдерді енгізуге үлкен мүмкіндік береді. 

Сонымен қатар Қазақстанда экономиканы жаңғырту, цифрландыру және декарбонизация бағытындағы реформалар белсенді түрде жүзеге асырылып жатқаны айтылды. Жапон компанияларының қатысуы бұл процесті одан әрі жеделдетуге ықпал етпек. 

Форум аясында нетворкинг және B2B кездесулер ұйымдастырылып, екі елдің бизнес өкілдері тікелей байланыс орнатуға мүмкіндік алды. Бұл өзара тиімді жобаларды талқылауға және жаңа серіктестік бағыттарын анықтауға жол ашты. 

Жиын барысында Қазақстан–Жапония комитетінің тең төрағасы Сәбір Есімбеков те сөз сөйлеп, екі ел арасындағы экономикалық байланыстардың маңыздылығын атап өтті. Сыртқы сауда палатасы алдағы уақытта да халықаралық әріптестікті дамытуға, инвестициялық байланыстарды нығайтуға және бірлескен жобаларды қолдауға дайын екенін жеткізді. 

Жарылқасын Шұғыла