Жапаров Мұхтар Шахановтың қазасына байланысты Тоқаев пен қазақ халқына көңіл айтты

Қырғызстан Президенті Садыр Жапаров Қазақстан Президенті Қасым-Жомарт Тоқаевқа көрнекті ақын Мұхтар Шахановтың қайтыс болуына байланысты көңіл айту жеделхатын жолдады.

Жапаров жеделхатында ақынның тек қазақ халқы үшін емес, қырғыз елі үшін де айрықша тұлға болғанын атап өтті.

«Мұхтар Шаханов – қазақтың ғана емес, қырғыз халқының да рухани тірегі еді. Оның өмірден өтуі бауырлас екі ел үшін де орны толмас қаза», – делінген жеделхатта.

Қырғызстан басшысы ақынның азаматтық ұстанымы мен әділдік жолындағы күресін ерекше атап өткен.

«Мұхтар аға ел тағдырына бейжай қарамай, шындықты тайсалмай айтқан қайраткер ретінде есте қалады», – деді ол.

Сонымен қатар Жапаров ақынның Шыңғыс Айтматовпен достығына тоқталып, бұл байланыс екі халықтың рухани жақындасуына ықпал еткенін жеткізді. Оның айтуынша, Шахановтың шығармашылығы мен қоғамдық қызметі түркі әлемінің ортақ құндылығы болып саналады.

Жапаров қазақ халқына үндеу жасады.

«Бүгін біз баршамызға ортақ асыл тұлғадан айырылып отырмыз. Мұндай қайғыны бірге көтереміз», – деп көңіл айтты ол.

Президент жеделхатында Мұхтар Шахановтың өмірден өтуін «бір дәуірдің аяқталуы» деп бағалап, оның жарқын бейнесі халық жадында мәңгі сақталатынын атап өтті.