Жәнібек Әлімханұлының допинг дауына қатысты мәлімдемесі

Орта салмақтағы WBO және IBF тұжырымдары бойынша әлем чемпионы Жәнібек Әлімханұлы басына түскен қиын кезеңде өзін қолдаған жанкүйерлеріне алғыс айтып, мәлімдеме жасады. Допинг сынамасының (В үлгісі) қорытындысы шықпай тұрып, боксшы әлеуметтік желідегі оқырмандарымен ой бөлісті.

Әлімханұлы өзіне сенім білдіріп жатқан жанкүйерлерінің қолдауы рух бергенін атап өтті.

«Шетелдіктер бұл дауға қуанып жатқанда, өз қазағымның маған қарсы шықпай, таза екеніме сенгені жаныма демеу болды. Мен тек жеңісті сәттерде ғана емес, ауыр кезде де қасымнан табылатын нағыз жанашыр жанкүйер жинағаныма қуаныштымын», -  деп жазды ол. Сондай-ақ, спортшы өзінің мансабында әрдайым таза спортты насихаттап келгенін тағы бір мәрте растады.

Естеріңізге сала кетейік, желтоқсан айындағы тексеріс кезінде Жәнібектің допинг сынамасы оң нәтиже көрсеткен болатын. Осыған байланысты көптен күткен Әлімханұлы - Эрисланди Лара арасындағы біріктіруші жекпе-жек ресми түрде тоқтатылды. Ұйымдастырушылар Лараның қарсыласын дереу ауыстырып, оны венесуэлалық Йохан Гонсалеспен жұдырықтастыратын болды.