Жәнібек Әлімханұлы жекпе-жектерден уақытша шеттетілді

Қазақстандық кәсіпқой боксшы Жәнібек Әлімханұлы допингке қатысты іс қаралып жатқан кезеңде уақытша жарыстарға қатыса алмайды. Бұл жөнінде Қазақстанның кәсіби бокс федерациясының президенті Рахымжан Ерденбеков хабарлады.

Федерация басшысының айтуынша, тыңдаулар аяқталғанға дейін спортшының жекпе-жектерге шығуына тыйым салынған.

«Іс қайта қаралғаннан кейін барлық материалдар халықаралық ұйымдарға, оның ішінде World Boxing Organization (WBO), International Boxing Federation (IBF) және басқа да тиісті құрылымдарға жіберіледі. Олар чемпиондық атақтарды сақтау немесе одан айыру туралы түпкілікті шешім қабылдайды. Ал қазірше, тыңдаулар біткенше, Жәнібекке жекпе-жек өткізуге рұқсат жоқ», – деді Рахымжан Ерденбеков.

Оның сөзінше, бұл мәселеге қатысты соңғы шешім халықаралық бокс ұйымдарының құзыретінде. Тыңдаулардың нақты қашан аяқталатыны әзірге белгісіз.