$ 491.59 € 572.16 ₽ 6.24

Жәнібек Әлімханұлы IBF чемпионы атағынан айырылды

Абдрахманов Мағжан
11 наурыз 2026, 09:52
Жәнібек Әлімханұлы IBF чемпионы атағынан айырылды Сурет авторы: No Limit Boxing

Қазақстандық боксшы Жәнібек Әлімханұлы IBF нұсқасы бойынша әлем чемпионы атағынан айырылды. Бұл туралы Қазақстан кәсіби бокс федерациясының президенті Рахымжан Ерденбеков мәлімдеді.

Оның айтуынша, Халықаралық бокс федерациясы (IBF) ұйымның қатаң ережелеріне сүйене отырып, чемпиондық титулды бос деп жариялау туралы шешім қабылдаған.

– Бүгін, бір сағат бұрын IBF ұйымынан ресми шешім келді. Олардың ережесіне сәйкес, кез келген салмақ дәрежесіндегі чемпион тоғыз ай ішінде өз белдігін қорғауы тиіс. Жәнібек титулын 2026 жылдың 4 шілдесіне дейін қорғауы керек еді. Қалыптасқан жағдайға байланысты IBF директорлар кеңесі 5 наурызда чемпиондық титулды бірден бос деп жариялау туралы шешім қабылдады, – деді Ерденбеков.

Сондай-ақ ол Жәнібек Әлімханұлы 2026 жылдың 2 желтоқсанына дейін шеттетілгенін айтты.

Федерация басшысы бұл жағдай боксшының командасы үшін үлкен сабақ болғанын атап өтті.

– Жәнібек биыл үлкен рингке қайта оралады және алдағы уақытта төрт бірдей әлемдік белбеуді иеленеді деп сенеміз. Бұл шешімге қатысты апелляция беріледі, – деді Ерденбеков.

Еске салайық, 3 желтоқсанға қараған түні Дүниежүзілік бокс ұйымы (WBO) қазақстандық орта салмақтағы боксшы Жәнібек Әлімханұлынан допинг табылуына байланысты тергеу жүргізіп жатқанын хабарлаған болатын.

Ал Туризм және спорт министрлігі спортшының допингті әдейі қабылдамағанына сенетінін айтып, оған қолдау көрсететінін мәлімдеді.

#Әлем чемпионы

Соңғы жаңалықтар