Жаңатастағы су тасқыны: Әкімдік шығынды есептейтін арнайы комиссия құрды

Толассыз жауын салдарынан жүздеген аула мен ондаған үйді су басқан Жамбыл облысының Жаңатас қаласында Төтенше жағдайлар қызметкерлері су сору жұмыстарын жалғастырып жатыр. Облыс билігі шығын көлемін анықтайтын комиссия құрды, деп хабарлайды әкімдік.

7 шілдеде Сарысу ауданы аумағында қатты жауын-шашын салдарынан бірқатар көшедегі 400-ден астам үйдің ауласын, 47 үйдің іші мен 1 мектептің жертөлесін су алды.

Жаңатас қаласындағы екі елді мекен (Малоэтажка, Дегерес) жарыққа қосылды. Тек Д. Қонаев орта мектебінде судан тазарту жұмыстарының жүргізілуіне байланысты жарық әлі берілмеді.

Төтенше жағдай салдарынан болған материалдық шығынды зерделеу бойынша жұмысшы топ құрылып, жұмыс жүргізіп жатыр.

8 шілде, таңертең ұшқызсыз ұшу аппаратының көмегімен су деңгейінің едәуір төмендегені анықталды. Адам, мал шығыны жоқ.

Зардап шеккен тұрғындар үшін 105 орындық екі қабылдау пункті дайындыққа келтіріліп, оған 12 адам орналыстырылды. Қазір олар өз еріктерімен үйлеріне қайтты.

«Жаңатас–Саудакент» тас жолы ашық.

Төтенше жағдайды жоюға азаматтық қорғау қызметтерінен 282 адам, 64 техника, 35 мотопомпа және 1 ұшқызсыз ұшу аппараты жұмылдырылған.

Айта кетейік, Жамбыл облысының әкімі Ербол Қарашөкеев кеше түнде Сарысу ауданы Жаңатас қаласына барып, су алған аулаларды аралап көріп, ахуалмен танысты.

Аудандағы ахуал аймақ басшысының бақылауында.