Жаңаөзендегі ереуіл: ҚазМұнайГаз мәлімдеме жасады

2024 жылғы 12 қарашадан бері «Өзенмұнайгаз» АҚ-ға қарасты Бұрғылау жұмыстары басқармасы (БЖБ) қызметкерлері рұқсатсыз акция өткізіп, бірқатар талап қойған еді. Компания басшылығы қызметкерлермен тұрақты түрде келіссөздер жүргізіп келеді.

3 желтоқсанда «ҚазМұнайГаз» ҰК АҚ Басқарма төрағасының орынбасары Бекзат Абайылданов жұмысшылармен кездесіп, мәселелерді талқылау мақсатында оларды жұмысқа оралуға шақырды. Кездесу нәтижесінде үш негізгі тармақтан тұратын хаттама әзірленді:

1. БЖБ жұмысшыларының толық құрамда жұмысқа шығуы;
2. Жұмысқа оралған жағдайда, жұмысшыларға тәртіптік жаза қолданылмайды;
3. Барлық талаптардың заңнамаға сәйкес бітімгерлік комиссия отырысында қаралуы.

Алайда БЖБ кәсіподақ төрағасы хаттамаға қол қоюдан бас тартты.

Компанияның түсіндіруінше, жұмысшылардың талаптарының бірі – ӨМГ зейнеткерлерінің балаларын тікелей жұмысқа алу – 2020 жылы бекітілген алгоритмге қайшы келеді. Бұл алгоритм жұмысқа қабылдауда тең мүмкіндіктерді қамтамасыз етіп, Жаңаөзен қаласындағы басқа жұмыссыз азаматтардың құқығын бұзбауды көздейді.

«ҚазМұнайГаз» өкілдері ӨМГ қызметкерлеріне көрсетілетін әлеуметтік көмектің көлемі мен шарттары туралы толық ақпарат ұсынды. Ұжымдық шартқа сәйкес, компания қызметкерлерін әлеуметтік қолдауға 44 млрд теңге бөлінген, оның ішінде 5 млрд теңге Бұрғылау жұмыстары басқармасына арналған. Әр қызметкерге жыл сайын орта есеппен 3,8 млн теңге әлеуметтік көмек көрсетіледі.

Компания БЖБ жұмысшыларын еңбек тәртібін сақтауға және мәселелерді заң аясында шешуге шақырды.