Жаңаөзенде заманауи газ өңдеу зауыты салынып жатыр: стратегиялық жоба 2027 жылы аяқталады

Мәжіліс депутаты, «AMANAT» партиясы фракциясының мүшесі Самат Мусабаев Жаңаөзен қаласында салынып жатқан жаңа газ өңдеу зауытының құрылыс барысымен танысты. Жоғары технологиялық нысан партияның сайлауалды бағдарламасы аясында жүзеге асуда және елдің газ қауіпсіздігін қамтамасыз етуде маңызды рөл атқармақ.

Жобаның құны — 216,8 млрд теңге. Құрылыс-монтаж жұмыстары 2024 жылдың 3 наурызында басталған. Жоспар бойынша зауыт жылына 900 миллион текше метр табиғи және ілеспе газ өндіруге қауқарлы болады. Құрылысты аяқтау мерзімі — 2027 жыл.

Қазіргі уақытта нысанның негізгі іргетастары қаланып, сыртқы инженерлік желілер тартылған. Автотұрақ аумағы асфальтталып, қосалқы стансада жерге тұйықтау жүйесінің алғашқы кезеңі аяқталды. Сондай-ақ уақытша электрмен қамту желісі іске қосылып, автокөлік таразылары орнатылды және қойма жабдықталды.

— 1973 жылдан бері жұмыс істеп келе жатқан ескі Қазақ газ өңдеу зауыты қазіргі сұранысты толық қамтамасыз ете алмайды. Жаңа зауыт іске қосылған соң сұйытылған газ тапшылығы жойылып, өңірдің өндірістік әлеуеті артады. Құрылыс сапасы мен мерзімі қатаң бақылауда болады, — деді депутат Самат Мусабаев.

Мамандардың айтуынша, қазір құрылыс алаңында зауыттың «Негізгі технология» бөлімі бойынша күрделі кешендер жұмысы жүргізілуде.

Айта кетейік, Маңғыстау облысы — Қазақстандағы табиғи газдың ең ірі тұтынушысы. Соңғы жылдары өңірде тұрғын үй және әлеуметтік нысандар құрылысының қарқыны артып, газға деген сұраныс та жыл сайын өсіп келеді.