Жаңаөзенде 11 баланың анасы TikTok-тағы видеосы үшін сотталды

Жаңаөзен соты 47 жастағы белсенді Жадыра Досекееваны Қылмыстық кодекстің "телекоммуникация желілерін пайдалана отырып, әлеуметтік алауыздықты қоздыру" бабы бойынша кінәлі деп тапты. Сот белсендіге үш жылға бас бостандығын шектеу жазасын және үш жыл әлеуметтік желілерді қолдануға тыйым салу туралы үкім шығарды. Сонымен қатар сот шешімі бойынша белсенді қоғамдық жұмыстарға тартылатын болды. 

Азаттықтың жазуынша, Досекеева бұл үкіммен келіспейді, ал оның қорғаушысы апелляциялық шағым түсірмек ниетте.

Айыптаушы тарап Досекееваны төрт жылға бас бостандығын шектеп, әлеуметтік желілерді қолдануға он жылға тыйым салуды сұраған болатын. Іс осы жылдың маусым айында қозғалды. Оған TikTok әлеуметтік желісіндегі Досекееваның "елде билікті ауыстыру қажет" деген пікірі негіз болған.

Айыптау актісінде белсендінің сөзінде билікті сынау бар деп танылғанымен, билікті күшпен басып алуға шақыру анықталмағаны жазылған. Бұған қоса, Досекееваның қаңтар оқиғаларына халықаралық тергеу жүргізу талабын білдірген жазбасы да сараптамаға ұсынылған. Белсендінің адвокаты сарапшының сөздерді контекстен алып қарағанын айтады.

Досекеева – 11 баланың анасы, Жаңаөзен қаласының тұрғыны. Ол 2019 жылдан бері түрлі наразылық шарасына қатысып, әлеуметтік желілерде саяси пікірлерін білдіріп келген. Осыған дейін бірнеше рет әкімшілік жауапкершілікке тартылып, айыппұлдарға ілінген.