Жаңа Салық кодексіне 45-тен астам маңызды түзету ұсынылды

Жаңа Салық кодексі жобасы бойынша құрылған Жобалық кеңсенің кезекті, 21-ші отырысында құжатқа енгізілетін түзетулердің жаңа пакеті талқыланды. Премьер-министрдің орынбасары – Ұлттық экономика министрі Серік Жұманғариннің төрағалығымен өткен жиында нормативтік құжатты жетілдіруге бағытталған 45-ке жуық өзгеріс қарастырылды.

Цифрлық технологиялар нарығын дамыту мақсатында жеке тұлғаларды 2026-2028 жылдар аралығында қазақстандық провайдерлер арқылы жүзеге асырылатын цифрлық актив операцияларынан түскен кіріс бойынша жеке табыс салығынан босату ұсынылуда.

Шетелдік және отандық инвесторлар үшін қолайлы жағдай жасау мақсатында инвестициялық келісімшарттардың тиімді тетіктері қайта жаңғыртылады. Инвесторларға инфрақұрылымды өз қаржысына жүргізіп, кейіннен корпоративтік табыс салығынан шегерім жасау арқылы шығынды өтеп алу мүмкіндігі қарастырылған.

Пакетке бұған дейін Жобалық кеңседе мақұлданған 20-ға жуық маңызды шешім енді. Олардың қатарында мүгедектігі бар жандар үшін жеке табыс салығын жеңілдету, әлеуметтік салық бойынша жеңілдіктерді қайтару, ауыл шаруашылығы өнімдері мен қаржылық қызметтерге (факторинг, форфейтинг) қатысты ҚҚС ережелерін оңтайландыру бар.

Сондай-ақ, салықтық әкімшілендіруді цифрландыруды тереңдету және салық рәсімдерін жеңілдету бойынша ауқымды жұмыстар жүргізілуде. Бұл шаралар мемлекеттік органдардың, «Атамекен» палатасының және Жоғары аудиторлық палатаның ұсыныстары негізінде әзірленді.

Министрлік өкілдерінің мәлімдеуінше, кейбір бастамалар әлі де бизнес-қоғамдастықпен терең талқылауды қажет етеді. Осы орайда, салық заңнамасын жетілдіру жөніндегі диалог Жобалық кеңсе алаңында жалғасатын болады.