Жаңа Конституция жобасы жалпыұлттық дауыс беруге дайын – Марат Шибұтов

Саясаттанушы Марат Шибұтов Қазақстан Республикасының жаңа Конституциясының жобасы жалпыұлттық референдумға шығаруға толық дайын екенін мәлімдеді.

Оның айтуынша, Ата Заңның жаңа редакциясына енгізілген әрбір тұжырым Конституциялық комиссия аясында жан-жақты талқылаудан өткен және қоғамдық пікір ескерілген. Барлық ұсыныс ашық форматта қаралып, түрлі көзқарастар мен сараптамалық ұстанымдар сүзгіден өткізілген.

Шибұтов азаматтардың жаңа Конституциядағы негізгі жаңашылдықтарды жалпы түсініп үлгергенін атап өтті. Бұл кең көлемді ақпараттық түсіндіру жұмыстарының нәтижесінде мүмкін болған.

«Қазіргі кезеңде біз әртүрлі сала өкілдерінің, түрлі тәжірибе мен дүниетаным иелерінің бірлескен еңбегінің нәтижесінде қалыптасқан жобаны көріп отырмыз. Сондықтан бұл құжатты жалпыұлттық дауыс беруге ұсынуға әбден болады деп есептеймін», – деп түйіндеді саясаттанушы.

Айта кетейік, жаңа Конституция жобасы алдағы уақытта жалпыұлттық референдумға шығарылуы тиіс.