Жаңа Конституция жобасы: Неке, отбасы және бала мүддесі қалай қорғалады?

Жалпыұлттық социал-демократиялық партиясының (ЖСДП) мүшесі Нұрлан Әуесбаев Ата Заңның жаңа жобасындағы отбасылық құндылықтар мен балалардың қауіпсіздігіне қатысты маңызды өзгерістерді түсіндіріп берді.

Партия өкілінің айтуынша, Конституцияда отбасы мен неке ұғымдарының нақты айқындалуы — қоғамдағы дәстүрлі құндылықтарды құқықтық деңгейде бекітудің айқын көрінісі. Жаңа жобада неке, отбасы, ана, әке және баланың мемлекеттің тікелей қорғауында екені шегелеп көрсетілген.

 «Бұл - отбасының жай ғана әлеуметтік ұғым емес, мемлекетіміздің іргетасын құрайтын және оның қорғауындағы ең маңызды институт екенін білдіреді», - деп атап өтті Н. Әуесбаев.

Жаңашылдықтарға сәйкес, мемлекет тарапынан қабылданатын кез келген заң мен шешім ең алдымен отбасы мүддесін ескере отырып жүзеге асырылуы тиіс. Бұл норма мемлекеттік органдарға шешім қабылдау барысында отбасылық құндылықтарды басты назарда ұстауға міндеттейді.

Нұрлан Әуесбаев балалардың қауіпсіздігі мәселесіне де ерекше тоқталды:

• Бала құқықтарын қорғау тетіктері айтарлықтай күшейтілді;
• Балаға қатысты қатыгездік пен зорлық-зомбылықтың кез келген түріне жол бермеу нормалары нақтыланды;
• Мемлекет баланың мүддесі мен қауіпсіздігін барлық жағдайда бірінші орынға қоюға міндеттеледі.