Жаңа Конституция күшіне енді: табиғатты аялау тұңғыш рет әрбір қазақстандықтың міндетіне айналды

Елімізде экологиялық мәдениетті жаңа сатыға шығаратын жаңа Конституция күшіне енді. Ата Заң аясында мемлекет пен қоғамның, сондай-ақ әрбір азаматтың қоршаған ортаны қорғауға қатысты жауапкершілігі ресми түрде бекітілді, деп хабарлайды ҚР Экология және табиғи ресурстар министрлігі.

Тарихи құжатқа сәйкес, әрбір азаматтың табиғатқа ұқыпты қарауы – конституциялық борыш. Конституцияның 37-бабында осы міндет айқын көрсетілген, ал преамбулада келер ұрпақ алдындағы экологиялық жауапкершілік пен табиғи ресурстарды ұтымды пайдаланудың маңызына баса назар аударылған.

Конституциялық жаңашылдықтар елімізде жүзеге асырылып жатқан «Таза Қазақстан» жалпыұлттық жобасының идеологиялық негізіне айналды. Мемлекет басшысы Қасым-Жомарт Тоқаевтың бастамасымен қолға алынған бұл жоба тек тазалық шаралары емес, қоғамда экологиялық мәдениетті қалыптастырудың негізгі тетігі болып табылады.

Жобаның ауқымын мына көрсеткіштерден аңғаруға болады:

•  5,2 миллион: отырғызылған ағаш көшеттері;
• 2,2 миллион тонна: жинақталған қоқыс көлемі;
• 3,4 миллион гектар: тазартылған аумақ.
• Бұл бастамаға жыл сайын 6,5 миллионнан астам қазақстандықтың атсалысуы оның бүкілхалықтық сипатқа ие болғанын дәлелдейді.

Экологиялық мәдениет – әр азаматтың үлесі

Экология және табиғи ресурстар министрлігі халықты табиғатқа жанашырлықпен қарауға шақырады. Министрлік өкілдері атап өткендей, ірі өзгерістер әркімнің күнделікті іс-әрекетінен: қоқысты дұрыс тастаудан, суды үнемдеуден, сенбіліктерге қатысудан және қоршаған ортаны таза ұстаудан басталады.

Бүгінгі таңда табиғатты қорғау – еліміздің тұрақты дамуы мен болашақ ұрпақтың қауіпсіз өмір сүруінің кепілі. «Таза Қазақстан» жобасы аясындағы әрбір игі іс – мемлекеттік деңгейдегі маңызды стратегиялық қадам.