Жаңа Конституция: Қазақстан заңдары халықаралық келісімдерден жоғары тұрады

Конституциялық комиссияның жетінші отырысында Мәжіліс депутаты Мұрат Әбенов жаңа Конституция жобасына сәйкес, Қазақстан заңдарының халықаралық шарттардан жоғары заңдық күшке ие болатынын мәлімдеді.

Оның айтуынша, жаңа жобада халықаралық шарттар қолданыстағы құқық ретінде сақталады, алайда ең жоғары заңдық күш тек Конституцияға тиесілі болады.

«Жаңа Конституция жобасында халықаралық шарттар қолданылатын құқық ретінде қалады, бірақ ең жоғарғы заңдық күш Конституцияда болады», – деді депутат.

Әбенов мұны бұрын халықаралық келісімдер мен ұлттық заңнама арасында қайшылықтар туындап, оның азаматтардың құқықтары мен бостандықтарына кері әсер етуі мүмкін болған жағдайлармен түсіндірді. Осындай кезде халықаралық шарттарға басымдық беріліп келгенін атап өтті.

Депутаттың сөзінше, қазіргі күрделі халықаралық жағдайда Қазақстан қабылдайтын кез келген халықаралық міндеттеме елдің егемендігі мен конституциялық құрылымының негіздері тұрғысынан бағалануы тиіс.

«Ешбір халықаралық шарт Конституцияның әрекетіне қарсы келмеуі керек», – деді ол.

Сонымен қатар Әбенов жаңа Конституция жобасында Қазақстан ратификациялаған халықаралық шарттар мен жалпыға танылған халықаралық құқық нормаларының заңдық күшіне күмән келтіретін нормалар жоқ екенін атап өтті. Яғни, бұл өзгерістер адам құқықтары мен бостандықтары жөніндегі қабылданған міндеттемелерден бас тартуды білдірмейді.

Сондай-ақ депутат алдағы уақытта әлеуметтік кепілдіктер тек Қазақстан азаматтарына немесе өз елінде қазақстандықтарға дәл сондай әлеуметтік қолдау көрсететін шетел азаматтарына ғана қолданылатынын айтты.