Жаңа Конституция қабылданса, Конституция күні өзгеруі мүмкін

Жаңа Конституция қабылданған жағдайда Қазақстанда Конституция күніне қатысты мерекелік күннің өзгеруі мүмкін. Бұл туралы мәдениет және ақпарат вице-министрі Евгений Кочетов Informburo.kz тілшісінің сұрағына жауап бере отырып мәлімдеді.

Вице-министрдің айтуынша, Конституциялық комиссия мүшелері арасында жаңа Негізгі заң қабылданған жағдайда мереке күнін көшіру қажет деген пікір айтылған. Алайда бұл мәселе бойынша нақты шешім қабылдауға әлі ерте.

«Мұндай пікірдің болғанын естідім. Олардың логикасы бойынша солай болуы мүмкін. Бірақ қазір нақты бір болжам айту қиын. Алдымен Конституциялық комиссия өз жұмысын аяқтауы керек, содан кейін ғана бұл мәселелер талқыланады. Біз – атқарушы органбыз, заңнамалық шешімдерге сәйкес әрекет етеміз. Сондықтан әзірге комиссия жұмысының аяқталуын күтіп отырмыз. Одан кейін референдум өтеді, содан соң қараймыз», – деді Евгений Кочетов Сенат кулуарында.

Ол сондай-ақ жаңа Конституция жобасына қоғам тарапынан көптеген пікір мен ұсыныс келіп жатқанын атап өтті.

Еске салайық, 31 қаңтарда Конституциялық комиссия елдің жаңа Негізгі заңының жобасын жариялаған болатын. Құжаттың түпкілікті нұсқасы жалпыұлттық референдумда қабылданады, алайда оның өтетін күні әзірге белгісіз.

Бұған дейін Конституцияның 77 бабына өзгеріс енгізу жоспарланғаны, бұл қолданыстағы мәтіннің 84 пайызына тең екені хабарланған. Алайда 29 қаңтардағы талқылау барысында арнайы комиссия мүшелері ұсынылған өзгерістердің ауқымы жаңа Конституция қабылдауды қажет етеді деген тоқтамға келген.