Жаңа Ата Заңда азаматтардың саяси наным-сенім бостандығы қалай қорғалады?

Қазақстан Халық партиясы фракциясының жетекшісі Магеррам Магеррамов Ата Заңның жаңа жобасындағы азаматтардың саяси құқықтарын қорғауға бағытталған маңызды нормаларға тоқталды.

Парламентшінің айтуынша, жаңа құжатта адамның наным-сенімі, көзқарасы немесе саяси өмірге қатысуына байланысты оның құқықтарын шектеуге тікелей тыйым салынады.

Магеррам Магеррамов мемлекеттің азаматты тек саяси ұстанымы үшін жұмыстан шығаруға, қоғамдық өмірге қатысуын шектеуге немесе оған қолайсыз жағдайлар жасауға құқығы жоқ екенін баса айтты.

 «Мемлекеттік деңгейдегі кез келген шектеулер тек заң бұзушылықтар негізінде, елдің қауіпсіздігін, қоғамдық тәртіпті және басқа адамдардың құқықтарын қорғау мақсатында ғана қолданылуы мүмкін», -  деді фракция жетекшісі.

Депутаттың пікірінше, бұл норма азаматтардың саяси құқықтарын сенімді қорғауды қамтамасыз етіп қана қоймай, қоғамның мемлекетке деген сенімін нығайтуға қызмет етеді. Бұл қадам Қазақстанның демократиялық бағытын айқындап, әрбір адамның өз пікірін еркін білдіруіне құқықтық кепілдік береді.