Жанабыловтар ұтысқа тіккен iPhone 16 смартфондары аукционға шығарылды

Ерболат Жанабылов пен Эльмира Төлегенова өз курсын сатып алушылар арасында ұтысқа тігеміз деп уәде еткен iPhone 16 смартфондары электрондық сауда порталына шығарылды.

Астана қаласының мемлекеттік мүлік және жекешелендіру департаменті жады көлемі 128 GB болатын 17 iPhone 16 смартфонын сатуға жариялады. Оның екеуі ақ түсті, жетеуі қара, сегізі ультрамарин түсті. Бағалау қорытындысына сәйкес, құрылғылардың техникалық жай-күйі жаңа, жалпы жағдайы жақсы деп көрсетілген.

Әр смартфонның бастапқы бағасы 484 990 теңге болып белгіленген. Кепілдік жарнасы – 72 749 теңге. Сауда-саттық 8 шілде күні сағат 10:00-де басталып, бағаны көтеру тәсілімен өтеді.

Бұған дейін департамент блогерлердің ісі бойынша тәркіленген сегіз Hyundai Elantra автокөлігін де сатуға шығарған болатын. Алайда әзірге оларды тек құқық қорғау органдары, арнайы мемлекеттік органдар және Президенттің, саяси қызметшілер мен депутаттардың қызметін қамтамасыз ететін мекемелер ғана сатып ала алады. Автокөліктер бойынша аукцион 7 шілдеге жоспарланған.

Еске салсақ, 27 сәуірде сот екі блогерді заңсыз кәсіпкерлікпен айналысу және қылмыстық жолмен алынған қаражатты заңдастыру ісі бойынша кінәлі деп таныған. Ерболат Жанабылов екі жылға шартты түрде бас бостандығынан айырылса, Эльмира Төлегеноваға екі жыл жаза тағайындалып, оны орындау кейінге қалдырылған. Олар мемлекетке келтірілген 247,7 млн теңгеден астам шығынды өтеген.