Жамбылда шетелден алдырып еккен 500 гектар алма бағы қурап қалды

Жамбыл облысында 7 жыл бұрын егілген шетелдік алма бақтары қурап жатыр, деп хабарлайды Qrnews тілшісі 24.kz-ке сілтеме жасап.

Шаруалар әрқайсысы 50 гектар болатын 10 алқаптың жеміссіз жарамай қалғанын айтады. Бұған қаржы институттарынан қолдаудың болмауы себеп. Енді алқапқа кеткен ақшаны мемлекет бізден өндіріп алмақшы деп шағымданып отыр. 

2017 жылы жылы кооператив құрып, 50 гектар жерге алма еккен 10 бағбанның қазіргі жағдайы бұл. Олар жемісті ел ішінде және алыс-жақын шет елге саудалаймыз деген мақсатта жоба жасап, ауыл шаруашылығын қаржылай қолдау қорынан несие алады. Өнімі мол болсын деп Сербиядан 125 мың дана алма көшетін әкелді. Алайда жемісін жей алмады. 

"Өз ақшаларымызды шығарып бейнеттеніп жатырмыз. Агроном жоқ. Сол алмаларға қарайтын агроном болу керек еді. Алмаларды дұрыс емес жерге отырғызғаны бір, шетелден келген алма жерсінбей жатыр", – дейді шаруалардың бірі Серік Ералиев.

Алманың бұл түрі екі жылда өнім беруге тиіс еді. Бірақ олай болмады. Оған бірнеше себеп бар дейді мамандар. Соның бірі – тұқымның жергілікті климат пен топыраққа жерсінбеуі. Бұған қоса қажетті күтімнің дер кезінде жасалмауы. Шаруалардың айтуынша, алғашқы екі жылда тыңайтқышқа берілетін субсидияны алу мүмкін болмады. Қолда бар қаржымен күтім жасаған. Бірақ көшеттер жайқалып кете қоймады. Ал «ҚазАгро» өкілдері шаруалардың шағымы орынсыз деп отыр. Себебі олар қаржыны алып, алма бақты өз дәрежесінде қарай алмады. 

"Енді көптеген проблемалар бар. Кейбір шаруаларда су жоқ дейді. Бірақ су бар. Енді ол әркімнің өз сылтауы бар. Аграрлық несие корпорациясы қаржы ұйымы болғандықтан қарыз алушылар туралы мәліметтерді жария етуге құқымыз жоқ", – дейді "Аграрлық несие корпорациясы" АҚ ОФ директорының орынбасары Бауыржан Тәжібаев.

О баста алма бақтың әр талынан 15 кг өнім алу жоспарланған.

"Сербиялық тұқымдар келген. Оның барлығы карантиндік, лабораториялық құжаттарының барлығы болған. Ол егілген. Ал шаруаның ары қарай агротехникалық жаңағы препараттармен өңделіп тұрды ма? Сол агротехникалық іс-шаралардың барлығын шаруалар дер кезінде орындауы керек", – дейді ауыл шаруашылығы басқармасы басшысының орынбасары Шәкім Момынқұлов.

Шаруалар шығын шаш етектен дейді. Ал қолдау қоры шаруаларға берген қаржыны өндіріп алу үшін сотқа жүгінбек.