Жамбыл облысының тұрғыны жедел жәрдем фельдшеріне травматикалық қарудан оқ атқан

Жамбыл облысында жергілікті тұрғын фельдшерге травматикалық қарудан оқ атып, жарақаттады. Бұл туралы облыстық полиция департаменті мәлімдеді. Аталған дерек бойынша қылмыстық іс қозғалып, тергеу амалдары басталды.

Облыстық денсаулық сақтау басқармасының хабарлауынша, фельдшерге шұғыл ота жасалып, екі сантиметрге дейін кірген оқ сәтті алынды. Қазір оның жағдайы тұрақты, өміріне қауіп жоқ. Науқас динамикалық бақылауда жатыр.

Бұған дейін әлеуметтік желіде екі жігіттің дефибрилляторды дені сау адамға қолдануға бола ма деген сұрақ бойынша дауласқаны туралы ақпарат тараған. Олар кеңес алу үшін жедел жәрдем фельдшеріне жүгінген. Медициналық қызметкер мұндай әрекеттің өмірге қауіпті екенін түсіндірген. Алайда бұл жауап жігіттерге ұнамай, жанжал туындаған. Сол кезде олардың бірі фельдшерге оқ атқан.