Жамбыл облысындағы сарбаз өлімі: Қызметіне салғырт қараған командир сот алдында жауап береді

Жамбыл облысында мерзімді қызметтегі сарбаз Еркебұлан Рүстемұлының өлімінен кейін рота командиріне қатысты қозғалған қылмыстық істі тергеу аяқталды. Бұл туралы Бас әскери прокуратураның баспасөз қызметі ресми мәлімдеме жасады.

Тергеу мәліметтері бойынша, Гвардия гарнизонындағы әскери бөлімнің рота командирі өз қызметіне салғырт қараған. Лауазымды тұлға жеке құрамның қызмет өткеруін және сарбаздардың қару-жарақпен жұмыс істеуін тиісті деңгейде бақыламаған. Сонымен қатар оның қаза тапқан сарбаздың қызметтестеріне қатысты билігін асыра пайдалану фактілері анықталды.

Қысқа мерзім ішінде барлық қажетті дәлелдемелер жинақталып, қылмыстық іс мәні бойынша қарау үшін сотқа жолданды. Бас әскери прокуратура өкілдері сарбаз өлімінің өзге де себептеріне қатысты тергеу амалдары әлі де жалғасып жатқанын атап өтті.

Еске сала кетейік, Еркебұлан Рүстемұлы 27 қаңтар күні қарумен жұмыс істеу кезінде алған жарақатынан көз жұмған болатын. Қазіргі уақытта тергеу барысы Бас әскери прокуратураның ерекше бақылауында.