Жамбыл облысындағы cарбаздың соққыға жығылуына байланысты командирлер қызметтерінен босатылды

Гвардиялық гарнизондағы әскери бөлімдердің бірінде мерзімді қызметтегі сарбаздың соққыға жығылуына байланысты бірқатар жоғары лауазымды тұлғалар қатаң жазаланды, деп хабарлайды Kaztag.kz

Қазақстан Республикасы Қорғаныс министрлігінің баспасөз қызметі сәрсенбі күні таратқан мәлімдемеге сәйкес, әскери қызметшіге дене жарақатын салу дерегі бойынша қылмыстық іс қозғалып, қазіргі уақытта тергеу амалдары жүргізілуде. Сонымен қатар  ведомство ішінде қызметтік тексеріс аяқталып, лауазымды тұлғалардың іс-әрекетіне құқықтық баға берілді.

Тексеріс қорытындысы бойынша төрт басшы лауазымынан босатылды:

• Әскери бөлім командирі;
• Бөлім командирінің тәрбие және идеологиялық жұмыстар жөніндегі орынбасары;
• Батальон командирі;
• Рота командирі.

Сондай-ақ, әскери бөлім командирінің орынбасары – штаб бастығына, батальон командирінің орынбасары мен оның тәрбие жұмысы жөніндегі орынбасарына «қызметіне толық сәйкес еместігі» туралы ескерту жарияланды. Бірқатар офицерлер мен сержанттар қатаң тәртіптік жауапкершілікке тартылды.

«Қабылданған шаралар атқаратын лауазымына қарамастан, әрбір маманның дербес және бұлтартпас жауапкершілігі принципін көрсетеді. Барлық мән-жайлар бойынша түпкілікті қорытынды тергеу нәтижесінде ҚР заңнамасына сәйкес берілетін болады», - деп атап өтті Қорғаныс министрлігі.